«ەسىل» اۋدانىندا وتكەن جىلى 25 تۇرعىن ءۇي كەشەنى قولدانىسقا بەرىلدى, دەپ حابارلايدى استانا قالاسى اكىمدىگىنىڭ سايتى.
«ەسىل» اۋدانىندا 445 كوپپاتەرلى تۇرعىن ءۇي كەشەنى بار, ال «جاعالاۋ» شاعىن اۋدانىندا 50 تۇرعىن ءۇي كەشەنى بار. سونىڭ 25-ءى 2017 جىلى قولدانىسقا بەرىلگەن», دەپ ايتتى «ەسىل» اۋدانىنىڭ اكىمى ەرماعانبەت بولەكپاەۆ.
اۋداندا كوندومينيۋمدى تىركەۋ بويىنشا بەلسەندى جۇمىس جۇرگىزىلۋدە. تىركەۋگە جاتاتىن 418 كوپپاتەرلى تۇرعىن ءۇيدىڭ 373-دە كوندومينيۋم بار, 45 تۇرعىن ءۇي كەشەنى تىركەۋدى تالاپ ەتەدى. وتكەن جىلى كوندومينيۋمعا 73 ءۇي تىركەلگەن.
كورسەتىلەتىن قىزمەتتەردىڭ ساپاسىن جاقسارتۋ ماقساتىندا, 2018 جىلى وسى اۋداندا ورنالاسقان پيك جۇمىسىنىڭ رەيتينگتىك باعالاۋ جۇيەسى ەنگىزىلەدى. بۇل جۇمىس قىزمەت كورسەتەتىن ۇيىمداردى وبەكتيۆتى تالداۋعا مۇمكىندىك بەرەدى.